ДУШАНБЕ, 07.03.2024. /АМИТ «Ховар»/. «Модар — олиҳаи меҳр» — таҳти чунин унвон имрӯз бахшида ба Рӯзи Модар дар Кохи «Суруш»-и пойтахт барномаи рангини фарҳангӣ доир гардид, ки дар он фаъолзанон, кормандони сохторҳои гуногуни ҷумҳуриявию шаҳрӣ ва намояндагони қишрҳои мухталифи ҷомеа иштирок намуданд, иттилоъ медиҳад АМИТ «Ховар».
Зимни ҳамоиш таъкид шуд, ки Модар сарчашмаи ҳаёт, маънибахши зиндагӣ ва муқаддастарин инсон барои фарзандон мебошад. Ҳамин аст, ки мардуми соҳибфарҳанги тоҷик аз қадимулайём ба қадру мартабаи волои Модар арҷ мегузорад ва ба ҷо овардани ҳурмату эҳтироми ӯ то ба имрӯз яке аз беҳтарин суннатҳои миллии мо ба шумор меравад.
Имрӯз модари тоҷик роҳбари кордон, олиму донишманд, табиби ҳозиқ, соҳибкори муваффақ ва албатта, тарбиятгари фарзандон ва нуру гармии ҳар хонадон аст.
Таъкид шуд, ки Мақомоти иҷроияи ҳокимияти давлатии шаҳри Душанбе ба хотири арҷгузорӣ ба заҳматҳои Зан – Модар ва дастгирии ҳамаҷонибаи онҳо пайваста тадбирҳои муассир амалӣ намуда, масъалаи таъмини ҳуқуқу манфиатҳои занон-модаронро ҳамеша дар маркази диққат қарор медиҳад.
Ҳамзамон барои беҳтар гардонидани вазъи иҷтимоии занон-модарон, ҳифзи ҳуқуқи оила ва модару кӯдак, фароҳам овардани шароити мусоиди зиндагиву корӣ барои занон ва муҳимтар аз ҳама, ҳарчи бештар ба раванди идораи давлат ҷалб намудани онҳо ва баланд бардоштани нақши иҷтимоии занону духтарон ҳамаи тадбирҳои заруриро амалӣ менамояд.
Гуфта шуд, ки занону духтарон ҳамчун сокинони пойтахт иқдоми созандаи шаҳрдориро ҳамеша дастгириву ҷонибдорӣ менамоянд ва дар амалӣ сохтани корҳои ободиву созандагӣ дар шаҳр, махсусан тозаву озода нигоҳ доштани муҳити шаҳр нақши беандоза доранд.
Дар фарҷом ба хотири фароғати иштирокдорон дастагули мусиқии иборат аз суруду таронаҳои дилангез дар васфи зан-модар бо иштироки устодони санъат ва ҳунармандони ҷавон пешкаши ҳозирин гардонида шуд.
Зарангези ЛАТИФ,
АМИТ «Ховар»
АКС: АМИТ «Ховар»
