«ЗИНДА БОШ, ЭЙ ВАТАН…». Суруди миллӣ — ҳидоятномае ба сӯи иттиҳоду сарҷамъӣ

0
197

«ЗИНДА БОШ, ЭЙ ВАТАН…». Суруди миллӣ — ҳидоятномае ба сӯи иттиҳоду сарҷамъӣ

ДУШАНБЕ, 12.12.2019 /АМИТ «Ховар»/. Имрӯзҳо ташаббуси аҳли илм ва маорифи Вилояти Мухтори Кӯҳистони Бадахшон дар бораи субҳгоҳон пеш аз оғози дарсҳо хондани Суруди миллии Ҷумҳурии Тоҷикистон аз тарафи намояндагони соҳа ва дигар идораю муассисаҳо  ҳамовозии зиёдеро  ба вуҷуд овардааст. Вобаста ба мавзӯъ, андешаҳои Мамнур НУРЗОДА, мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Бӯстони вилояти Суғдро манзури хонандагони АМИТ “Ховар” мегардонем.

Вақте тариқи воситаҳои ахбори омма дар бораи пешниҳоди аҳли илму маърифати Вилояти Мухтори Кӯҳистони Бадахшон дар мавриди қабл аз оғози машғулиятҳои таълимӣ ба таври зинда хондани Суруди миллии Ҷумҳурии Тоҷикистон хабардор шудам, вуҷудамро бори дигар эҳсоси гарми ватандӯстиву муҳаббат ба рамзҳои асосии давлатӣ фаро гирифт.

Дар ҳақиқат лаҳзаи садо додани Суруди миллӣ инсон болидахотир ва сарфароз мегардад. Агар мушоҳида намоем, дар ҷомеа сурудҳо зиёданд ва ҳар кадоме байни мардум ҳаводорони худро доранд. Хушбахтона, Суруди миллӣ ягона суруд ва ҳидоятномаест, ки мардумро ба иттиҳоду сарҷамъӣ, сулҳ, дӯстиву ҳамзистӣ даъват ва раҳнамоӣ мекунад. Албатта, ҳар як фард аз домони поки модар дар оғӯши гуҳарбори меҳан ба дунё омада, Ватанро бо баҳои ҷони худ дӯст медорад. Аз ин нуқтаи назар дӯст доштани Ватан аз дӯст доштан ва эҳтирому арҷгузорӣ ба арзишҳои миллӣ, муқаддасот ва рамзҳои давлатӣ сарчашма мегирад.

Вақте Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба кишварҳои хориҷӣ сафар мекунанд, ба ифтихорашон Суруди миллии Ҷумҳурии Тоҷикистон иҷро карда мешавад.

Вақте варзишгаре дар мусобиқае ғолибият ба даст меоварад, ба ифтихораш Суруди миллии Ҷумҳурии Тоҷикистон садо медиҳад.

Вақте иҷлосияи Маҷлиси намояндагон, Маҷлиси вакилони халқ ва ё ҷаласаи расмие баргузор мегардад ва дар он Суруди миллии Ҷумҳурии Тоҷикистон садо медиҳад, чӣ гуна моҳият ва шаҳомати он баланд мегардад.

Аҳамияти қабл аз оғози машғулиятҳои таълимӣ дар муассисаҳои таҳсилоти миёна ва олӣ садо додани Суруди миллӣ дар он аст, ки хонандагону донишҷӯён ҳамчун насли имрӯз ва ояндасоз бо таманниёти сарбаландиву ҷовидонии Тоҷикистони муқаддас онро бо ғуруру муҳаббати саршори ватандӯстӣ қироат намуда, бо итминон изҳор медоранд, ки бахту саодат, ному нанг, бақову мароми ҷисму ҷон, ҳастиву ҷовидонии мо Тоҷикистони озоду соҳибистиқлол аст.

Мо, ҷавонон ташаббуси омӯзгорони Вилояти Мухтори Кӯҳистони Бадахшонро ҳамаҷониба дастгирӣ намуда, ҳамовозии хешро дар амалӣ гардидани ин ташаббуси неку наҷиб, ки ба эҳтирому арҷгузорӣ ба рамзҳои давлатӣ ва баланд бардоштани эҳсоси гарми ватандӯстӣ ва ифтихори ватандории насли шоистаи замон равона шудааст, баён медорем.

Мамнур НУРЗОДА,
мудири шуъбаи рушди иҷтимоӣ ва робита
бо ҷомеаи дастгоҳи раиси шаҳри Бӯстон

Источник: khovar.tj