Унвони Далер Назаров: факат президент ҳақ дорад

0
181

Унвони Далер Назаров: факат президент ҳақ дорад

Масъулини Вазорати фарҳанги Тоҷикистон таъкид доштанд, ки агар Далер Назаров, овозхони шинохтаи кишвар санадҳояшро ба расмият дарорад барои ӯ ҳеҷ монеаю маҳдудияте барои гирифтани мукофоти давлатӣ нест

ДУШАНБЕ, 5 фев — Sputnik.  Масъулини вазорати фарҳанги Тоҷикистон имрӯз зимни нишасти матбуотӣ дар Душанбе қайд намуданд, ки Далер Назаров, овозхони шинохтаи кишвар ба хотири доштани ду шаҳрвандӣ доштанаш санадҳояшро бояд тавасути Вазорати корҳои хориҷа тибқи моддаи 5 Қонуни Тоҷикистон “ Дар бораи мукофотҳои давлатии Тоҷикистон” ба расмият дарорад ва ба Вазорати фарҳанг пешниҳод намояд.

Тибқи моддаи 5 қонуни мазкур  шаҳрвандони хориҷӣ, шахсони бешаҳрвандро барои сарфарозгардонӣ Вазорати корҳои хориҷии Тоҷикистон аз рӯи тартиб муқарраргардида пешниҳод менамояд. Шаҳрвандони Тоҷикистон метавонад бо мукофотҳои давлатии хориҷӣ сарфароз гардонида шаванд.

Масъулини вазорат ҳамчунин афзуданд, ки дар ҳолати бидуни расмиёт ва пешниҳод маводҳои дахлдор Вазорат салоҳият надорад худсарона Далер Назаровро ба мукофот пешниҳод намояд.

“Ин салоҳият фақат дар дасти раиси Комиссияи мукофотонии назди Президенти Тоҷикистон Эмомалӣ Раҳмон аст. Ба истиснои раиси ҳукумати Тоҷикистон дигар ҳеҷ нафар салоҳияти чунин ваколатро надорад”, гуфт масъулини вазорати фарҳанг.

Ҳамзамон масъулини Вазорати фарҳанг қайд карданд, ки баъд гузаштани расмиёт дар Вазорати фарҳанг ин масъала баррасӣ мешавад ва як комиссия бо салоҳият аз ҳисоби собиқадорони касбӣ таъсис дода мешавад.

“Мо умед дорем, мутмаин ҳам ҳастем ва  кафолат медиҳем, ки Далер Назаров бидуни ягон чуну чаро ба ҳукумати Тоҷикистон мактубҳояшон ирсол мегардад ва ӯ соҳиби ҷоизаи давлатӣ мегардад”, – таъкид доштанд масъулини Вазорати фарҳанг.

Ёдрас мешавем, ки қаблан собиқ вазири фарҳанги Тоҷикистон Шамсиддин Орумбекзода гуфта буд барои Далер Назаров, ҳеч монеаю маҳдудияте барои гирифтани мукофотҳои давлатӣ нест.

Орумбекзода гуфт, ҳамчун вазир ваколат надорад, ки тартиботи қонунро нақз кунад ва додани мукофотҳои давлатӣ наметавонад бо супориш аз боло сурат бигирад.

Ӯ гуфт, ҳеч кас барои Далер Назаров маҳдудият эҷод накардааст, кадом нафаре набошад, Далер Назаров ё каси дигар бояд ҳуҷҷатҳоро таҳия кунаду зина ба зина аз тартиби муайяншуда гузарад. Ӯ бо таассуф изҳор дошт, ки ин расмиёт то ҳол анҷом дода нашудааст. Вазир зинаҳои пешниҳод ба мукофотҳои давлатиро шарҳ дод.

“Дар навбати аввал ҳуҷҷатҳо дар ҳайати коллективи ҳамкорон таҳия мешавад, баъд бо ҳукумати шаҳр мувофиқа мешавад, баъд аҳли ҳунар ба Вазорати фарҳанг пешниҳод мешаванд, мо ба Ҳукумати ҷумуҳурӣ пешниҳод мекунем. То имрӯз мутаассифона чунин пешниҳод нашудааст”, – изҳор дошт Орумбекзода.

Вазир таъкид намуд, ки барои гирифтани мукофоти давлатӣ расмиёти қонун бояд иҷро шаваду пешниҳодҳо метавонанд аз сатҳи ноҳияю вилоятҳо ироа гарданд. Орумбекзода илова намуд, ки хоҳ вазир бошад, хоҳ падари вазир, бояд меъёри қонунҳо риоя шавад.

Ӯ таъкид кард, ки наметавонад ба Ҷаноби олӣ расонад, ки Далер Назаров мардаки хуб аст, мукофот диҳед.

Дар ҳамин ҳол, худи Далер Назаров бо нашри як баёнияе дар саҳифаи Facebook худ изҳор доштааст, ки ба ӯ ҳеҷ унвон лозим нест, зеро муҳаббати мухлисон барояш унвон мебошад.

“Замоне дар куҷое ҳам атрофи ҳамин савол баҳс карда буданд ва ман мегӯям, ки мусиқӣ барои ман кор нест, балки зиндагӣ, муҳаббат ва истироҳати ман аст. Чаро барои коре, ки ман аз иҷрои он лаззат мебарам, мукофотам бидиҳанд? Ин ҳам мисли онест, ки барои нафаскашӣ ба ман мукофот медиҳанд”,-изҳор доштааст Далер Назаров.

Ҳамчунин, овозхон гуфтааст, ки атрофи ин баҳсҳо вокунише нишон доданӣ набуд, вале кор то ба вазири фарҳанг, ки ӯ зиёд эҳтиромаш мекунад, расидааст ва намехоҳад, ки вазир дар ҳолати ногувор монад.

“Ман дар ягон муассисаи давлатӣ собиқаи корӣ надорам. Аз рӯи маълумот ман муаллими забон ва адабиёти рус мебошам. Ба ҳамин хотир пешниҳоди ин савол ба Шамсиддин Орумбекзода, вазири фарҳанг асос надорад. Аз таҳти дил хоҳиш мекунам, ки дигар масъалаи ба ман додани унвонро ба миён нагузоред”,-таъкид доштааст Далер Назаров.

Источник: sputnik-tj.com