Тағйироти кадрӣ бо ризояти президент: Шарифзода муовини раиси шаҳри Хуҷанд таъйин шуд

0
222

Тағйироти кадрӣ бо ризояти президент: Шарифзода муовини раиси шаҳри Хуҷанд таъйин шуд

Дар шаҳри Хуҷанд муовини нави раиси шаҳри Хуҷанд оид ба масоили иқтисод, саноат ва энергетикаро муаррифӣ карданд

ДУШАНБЕ, 7 фев — Sputnik. Бино ба гузориши котиботи шаҳрдорӣ, муовини нави Маъруф Муҳаммадзода бо розигии президент Эмомалӣ Раҳмон ва раиси вилояти Суғд Раҷаббой Аҳмадзода таъйин шудааст.

Ҳамин тавр мувофиқи қарори раиси шаҳри Хуҷанд, Асрор Шарифзода ба вазифаи муовини раиси шаҳр таъин гардид.

Ғолиб Шарифзода, мудири шуъбаи кор бо кадрҳои дастгоҳи раиси вилояти Суғд зимни муаррифии кадри тозатаъин иттилоъ додааст, ки Асрор Шарифзода соли 1998 ДДХ ба номи академик Бобоҷон Ғафуровро бо ихтисоси иқтисодчӣ хатм намуда, то имрӯз дар вазифаи гуногуни Мақомоти иҷроияи ҳокимияти давлатии шаҳри Хуҷанд ифои вазифа намудааст.

Зикр гардидааст, ки Асрор Шарифзода 20 сол инҷониб дар бахшҳои мухталифи шаҳрдорӣ, аз ҷумла кумитаи амвол, шуъбаи меҳнат ва шуғли аҳолӣ, сармоягузорӣ ва идораи амволи давлатӣ, бахши ҳифзи иҷтимоии аҳолӣ ва ғайраҳо пурсамар фаъолият намудааст.

Раиси шаҳри Хуҷанд Маъруф Муҳаммадзода гуфтааст, ки минбаъд 12 бахшу шуъба ва раёсатҳои мақомоти шаҳри Хуҷанд, аз ҷумла шуъбаи иқтисод ва савдо, бахшҳои сармоягузорӣ ва амволи давлатӣ, саноат ва энергетика, раёсатҳои молия ва омор, нозироти андоз, муҳоҷират ва ғайраҳо таҳти сарпарастии Асрор Шарифзода фаъолият хоҳанд намуд.

Мавсуф ҳамчун муовини Раиси шаҳри Хуҷанд оид ба масоили иқтисод, саноат ва энергетика фаъолияти худро оғоз мебахшад.

Ба муовини нва таъкид шудааст, ки вазифа ва масъулияти роҳбариро бо тарзу усулҳои муосир, меҳнати софдилона баҳри ободии Ватан ва таъмини фазои шаффофу мусоиди кору фаъолият дар ниҳодҳои зери роҳбарияш роҳандозӣ намояд.

Асрор Шарифзода 15 октябри соли 1976 дар шаҳри Хуҷанд таваллуд шудааст.

Ӯ то таъин гардидан ба маснади муовини раиси шаҳри Хуҷанд дар вазифаи мудири бахши ҳифзи иҷтимоии шаҳри Хуҷанд кор кардааст.

Оиладор, соҳиби 3 фарзанд аст.

Источник: sputnik-tj.com