Раёсати Вазорати корҳои дохилӣ: Ронандаи фирорӣ боздошт гардид

0
112

Раёсати Вазорати корҳои дохилӣ: Ронандаи фирорӣ боздошт гардид

ДУШАНБЕ, 02.06.2020. /АМИТ Ховар/. Тавре қаблан хабар дода будем, 31 май ронандаи мошини  шахсияташ номаълум шаҳрванд Саъдуллоева Холбӣ Маҳмадаминовна, соли таваллудаш 1986, истиқоматкунандаи шаҳри Душанбе, кӯчаи Чортутро ҳангоми ба роҳрубӣ машғул буданаш дар кӯчаи Н. Қарабоев бо мошинаш пахш намуда, аз ҷойи ҳодиса фирор карда буд.

Дар асоси маълумоти Раёсати Вазорати корҳои дохилӣ дар шаҳри Душанбе ба АМИТ «Ховар», кормандони мақомоти милитсияи пойтахт дар натиҷаи бурдани корҳои фаврӣ-ҷустуҷӯӣ шахсияти ронандаро муайян намуда, мошинашро ба шуъбаи БДА РВКД дар шаҳри Душанбе ҳозир намуданд.

Дар натиҷа муайян карда шуд, ки ронандаи мошини тамғаи «Опел-Астра», рақами қайди давлатияш 7222 СМ 01, шаҳрванд Алиев Сангмаҳмад Валиевич, соли таваллудаш 1992, истиқоматкунандаи шаҳри Душанбе, кӯчаи Чортут мебошад, ки дар ҳақиқат 31 майи соли ҷорӣ, тақрибан соати 03:10, ҳангоми идора намудани воситаи нақлиёт дар кӯчаи Н. Қарабоев ҷавонзани роҳрӯбро пахш намудааст.

Номбурда ба ҷойи он ки дар ҷойи ҳодиса ёрии амалии худро ба ҷабрдида расонад, баръакс, худсарона ҷойи ҳодисаро тарк намудааст.
Вобаста ба ҳолати мазкур санади дахлдор тартиб дода шуда, таҳқиқи он ҷараён дорад.

Айни замон ҷабрдида Холбӣ Саъдуллоева баъд аз муоинаи табибон ба хонааш рухсат шуда, саломатиаш хуб мебошад.

Источник: khovar.tj