Изҳороти матбуотӣ аз рӯйи натиҷаҳои мулоқоту музокирот бо Президенти Туркманистон Сердар Бердимуҳамедов

0
96

Муҳтарам намояндагони воситаҳои ахбори омма,

Мехоҳам бори дигар Президенти Туркманистон муҳтарам Сердар Гурбангулиевич Бердимуҳамедовро барои нахустин ташрифи давлатӣ ба Ҷумҳурии Тоҷикистон сидқан хайрамақдам гӯям.

Ин сафарро рӯйдоди баҳоят муҳими 30-солагии барқарор намудани муносибатҳои дипломатӣ байни ду давлат меҳисобам.

Мо навакак Эъломия қабул намудем ва муносибатҳо байни давлатҳоямонро ба сатҳи ҳамкории амиқи стратегӣ баровардем.

Ин қарори таърихӣ ҷавобгӯи манфиатҳои халқҳоямон буда, яке аз омилҳои муҳими рушд ва оромӣ дар минтақа мебошад.

Хурсандиовар аст, ки дар арафа ва дар доираи сафар дар пойтахти мамлакат – шаҳри Душанбе дар самтҳои гуногун чорабиниҳо барпо гардид.

Ин бизнес-форум, намоишгоҳи маҳсулот ва мулоқоти намояндагони аҳли илми ду мамлакат мебошад.

Онҳо ба музокироти имрӯза, ки аз рӯи натиҷаҳояшон бастаи ҳуҷҷатҳои дутарафа имзо шуд, тобиши мусбат бахшиданд.

Дӯстони азиз,

Музокироти мо бо муҳтарам Сердар Гурбонгулиевич дар руҳияи созанда ва эътимод доир гардид.

Мо аҳамияти музокироти мунтазами сиёсиро дар ҳамаи сатҳҳо таъкид намудем.

Ҳамчунин аз фаъол гаштани муносибатҳои байнипарлумонӣ изҳори хурсандӣ намудем.

Аҳамияти рушди фаъоли минбаъдаи муносибатҳои тиҷоратӣ – иқтисодиро таъкид намудем.

Ҳукуматҳои давлатҳои мо пешниҳодҳои дахлдорро оид ба сифатнок баланд бардоштани муносибатҳои иқтисодӣ таҳия ва пешниҳод менамоянд.

 Бешак, ба ҳалли ин масъала санадҳои имрӯз имзошуда оид ба рушди муносибатҳои тиҷоратӣ – иқтисодӣ мусоидат хоҳанд намуд.

Мо оид ба баланд бардоштани самаранокии кори Комиссияи муштараки байниҳукуматӣ оид ба ҳамкории тиҷоратӣ – иқтисодӣ ва илмию техникӣ мубодилаи афкор намудем.

Зимни музокирот ба кооператсияи саноатӣ таваҷҷуҳи махсус зоҳир карда шуд.

Имрӯз «Харитаи роҳ» барои вусъат додани ҳамкорӣ дар соҳаи кишоварзӣ барои давраи то соли 2025 қабул гардид. Итминон дорем, ки он барои рушди ҳамкорӣ дар ин самт заминаи хуб мегардад.

Зарурати рушди фаъоли ҳамкориро дар соҳаи нақлиёт таъкид намудем.

Ҳаҷми боркашонӣ тавассути нақлиёти автомобилӣ ва роҳи оҳан дар давлатҳои мо афзун хоҳад шуд.

Бо ин мақсад имрӯз Барномаи муштараки чорабиниҳо (ё «Харитаи роҳ») дар бораи густариши ҳамкории минбаъда дар соҳаи зиёд кардани ҷараёни бор ва фаъолгардонии боркашонии мултимодалӣ қабул гардид.  

Мо ба зарурати истифодаи ҳаматарафаи иқтидори ҳамкории байнипарлумонӣ таваҷҷуҳи хосса зоҳир намудем.

Итминон дорам, ки санадҳои имрӯз қабулшуда дар ин соҳа ба ташкили сафарҳои ҳамдигарӣ, таҳкими робитаҳои корӣ ва баргузор намудани барномаҳои фарҳангӣ – гуманитарӣ байни минтақаҳои давлатҳоямон мусоидат хоҳад кард.

Мо ба соҳаи фарҳангӣ – гуманитарӣ, аз ҷумла илм ва маориф таваҷҷуҳи махсус зоҳир намудем.

Имрӯз дар вазъияти тантанавӣ мо бо муҳтарам Сердар Гурбангулиевич ба сохтмони мактаби миёнаи ба номи Махтумқулӣ дар ноҳияи Дӯстии вилояти Хатлон оғоз бахшидем.

Ин мактаб аз ҷониби Туркманистон сохта шуда, рамзи дурахшони дӯстӣ байни халқҳои бародари мо мегардад.

Мо масъалаҳои бехатарии минтақавиро муфассал муҳокима намудем.

Ҳавасмандии хешро ба таҳкими ҳамкорӣ дар муқовимат ба чолишҳои нав ва таҳдидҳо ба бехатарӣ таъкид намудем.

Мо оид ба фаъол гардонидани ҳамкорӣ дар доираи хадамоти махсуси худ ба тавофуқ расидем.

Мо оид ба вазъият дар Афғонистон мубодилаи афкор намудем.

 Таъкид гардид, ки мо ҳамчун ҳамсояҳои наздик сидқан ба барқарор шудани сулҳи дарозмуддат ва оромӣ дар ин мамлакат ҳавасмандем.

Таъкид гардид, ки ҳамкории Тоҷикистон ва Туркманистон дар доираи созмонҳои байналмилалӣ ва минтақавӣ дар маҷрои созанда рушд менамояд.

Мо омодагии давлатҳои худро барои дар сатҳи баланди пурмазмун гузаронидани саммитҳои Вохӯрии машваратии сарони давлатҳои Осиёи Марказӣ ва Бунёди байналмилалии наҷоти Арал моҳи сентябри ҳамин сол дар шаҳри Душанбе таъкид намудем.

Мо муҳтарам Сердар Гурбангулиевичро тирамоҳ дар Тоҷикистон барои ширкат дар ин чорабиниҳо интизор мешавем.

Ҷониби Тоҷикистон ба натиҷаҳои музокирот бо Президенти Туркманистон, ки дар ҳамкории стратегии Тоҷикистон ва Туркманистон саҳифаи нав боз менамояд, баҳои баланд медиҳад.

Ҳоло ман бо камоли мамнуният суханро ба Президенти муҳтарами Туркманистон медиҳам.

Маводҳо доир ба мавзӯъ:

Маводи дигар вобаста ба робитаҳо дар сатҳи олӣ миёни Тоҷикистон ва Туркманистон

Источник: president.tj