ИМРӮЗ – РӮЗИ КОРМАНДОНИ ГУМРУКИ ТОҶИКИСТОН. Давлаталӣ Саид миннатдории Пешвои миллатро барои барзиёд иҷро намудани нақшаи пардохтҳо ба онҳо расонид

0
282

ИМРӮЗ – РӮЗИ КОРМАНДОНИ ГУМРУКИ ТОҶИКИСТОН. Давлаталӣ Саид миннатдории Пешвои миллатро барои  барзиёд иҷро намудани нақшаи пардохтҳо  ба онҳо  расонид

ДУШАНБЕ, 22.01.2020/АМИТ «Ховар»/. Тавре қаблан иттилоъ додем, 22 январ  кормандони  соҳаи гуируки  Тоҷикистон иди касбии худ- Рӯзи таъсиси Хадамоти гумрукро таҷлил намуданд. Ба ин муносибат дар асоси муқаррароти моддаи 486 –и Кодекси гумруки Ҷумҳурии Тоҷикистон дар Хадамоти гумруки  назди Ҳукумати Ҷумҳурии Тоҷикистон  маросими савгандёдкунии як гурӯҳ ҷавонафсарон бо иштироки муовини аввали Сарвазири Ҷумҳурии Тоҷикистон Давлаталӣ Саид ва Сардори Хадамоти гумруки назди Ҳукумати Ҷумҳурии Тоҷикистон, генералмайори хадамоти гумрук Хуршед Каримзода баргузор гардид.

Баъд аз маросими савгандёдкунӣ Сардори хадамоти гумрук дар бораи ташаккул ва рушди мақомоти гумрук дар даврони истиқлолияти давлатӣ иброз дошт, ки  “айни замон бо мақсади боз ҳам беҳтар ба роҳ мондани фаъолияти мақомоти гумрук  ҷиҳати муҷҷаҳазгардонии дидбонгоҳу озмоишгоҳҳо ва амалӣ намудани корҳо дар самти ташкили низоми электронии назорат ва барасмиятдарории гумрукӣ давра ба давра тадбирҳои зарурӣ андешида шуда истодаанд”.

Зикр шуд, ки Ҷумҳурии Тоҷикистон узви Созмони ҷаҳонии савдо, Созмони ҷаҳонии гумрук ва иштирокчии зиёда аз 120 конвенсияҳои байналмилалӣ, шартномаҳои байнидавлатӣ, байниҳукуматӣ, байниидоравии бисёрҷониба ва дуҷониба дар соҳаи фаъолияти гумрукӣ мебошад.

Чунин заминаи боэъдимоди ҳуқуқӣ имкон фароҳам меорад, ки мақомоти гумруки ҷумҳурӣ дар ояндаи наздик ба як ниҳоди нақшгузори иқтисодиёти мамлакат табдил ёфта, дар амалӣ гаштани барномаҳои давлатии рушди Тоҷикистон мусоидат хоҳад намуд.

Муовини аввали Сарвазири мамлакат Давлаталӣ Саид гумрукчиёнро бо иди касбиашон табрик намуда,   аз фаъолияти назарраси кормандони ин мақомот  ёдовар шуд. Мавсуф барои барзиёд иҷро намудани нақшаи пардохтҳои гумрукӣ миннатдории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба кормандони  мақомоти гумрук расонд. Давлаталӣ Саид таъкид намуд, ки минбаъд низ иҷрои дастуру супоришҳои роҳбарияти давлату Ҳукумати мамлакат бояд  саривақтӣ иҷро гардад. Зикр кард, ки шароити имрӯзаи иқтисодиёти ҷаҳонӣ барои беҳтар намудани вазъи соҳаҳои иқтисоди миллӣ доир ба истифодаи самараноки захираву иқтидорҳои молиявӣ, истеҳсолӣ ва табиии мамлакат, пешбурди сиёсати самараноки молия ва қарз, риояи қатъии низоми истифодаи сарфакоронаи маблағҳои буҷетӣ, таъмини амнияти озуқаворӣ, ҳимояи истеҳсолкунандагони ватанӣ ва тақвияти иқтидорҳои содиротӣ идомаи  фаъолияти пурмаҳсулро талаб дорад.

ИМРӮЗ – РӮЗИ КОРМАНДОНИ ГУМРУКИ ТОҶИКИСТОН. Давлаталӣ Саид миннатдории Пешвои миллатро барои  барзиёд иҷро намудани нақшаи пардохтҳо  ба онҳо  расонид ИМРӮЗ – РӮЗИ КОРМАНДОНИ ГУМРУКИ ТОҶИКИСТОН. Давлаталӣ Саид миннатдории Пешвои миллатро барои  барзиёд иҷро намудани нақшаи пардохтҳо  ба онҳо  расонид

Дастгирӣ ва ҳавасмандгардонии кормандони мақомоти гумрук зери таваҷҷуҳи доимии роҳбарияти давлату Ҳукумати мамлакат қарор  дошта, дар ҳамоиши идона муовини аввали Сарвазири мамлакат Давлаталӣ Саид бо қарори Шӯрои роҳбарони хадамоти гумруки давлатҳои штирокчии Иттиҳоди Давлатҳои Мустақил барои фаъолона иштирок намудан дар корҳои Шӯрои роҳбарони хадамоти гумруки давлатҳои иштирокчии Иттиҳоди давлатҳои мустақил ва саҳми арзанда дар рушди ҳамкории байналмилалии гумрукӣ ба роҳбарият ва кормандони Хадамоти  гумрук мукофотҳо супорид.

Ҳамзамон бо фармоиши Сардори Хадамоти гумрук барои иҷрои софдилонаи уҳдадориҳои хизматӣ, интизоми намунавӣ, ноил гаштан ба натиҷаҳои назаррас дар фаъолияти хизматӣ ва ба муносибати ин ҷашни пуршукӯҳ роҳбарият ва кормандони мақомоти гумруки Ҷумҳурии Тоҷикистон бо мукофотҳо, ифтихорнома, медали ҷашнии «25-солагии мақомоти гумруки Ҷумҳурии Тоҷикистон» ва нишони сарисинагии «Аълочии мақомоти гумрук» сарфароз гардонида шуданд.

Бояд зикр кард, ки гумрукчиёни тоҷик соли 2020 иди касбии худро дар ҳоле таҷлил  намуданд, ки соли гузашта аз ҳисоби барзиёд иҷро гардидани нақшаи пардохтҳои гумрукӣ ба буҷети давлатӣ 365,6 миллион сомонӣ зиёд маблағ ворид гардид. Маблағи ҷамъоварӣ намудаи пардохтҳои гумрукӣ соли 2019 нисбат ба соли 2018 ба андозаи 652,1 миллион сомонӣ зиёд мебошад.

Марзияи САИД,
АМИТ «Ховар»

Источник: khovar.tj