Ифтитоҳи Корхонаи коркарди шишаи сохтмонии ҶДММ “Шишасохтмон” дар ноҳияи Бобоҷон Ғафуров

0
111

13 ноябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ ба вилояти Суғд дар ноҳияи Бобоҷон Ғафуров корхонаи коркарди шишаи сохтмонии Ҷамъияти дорои масъулияти маҳдуди “Шишасохтмон”-ро ифтитоҳ намуданд.

Корхона аз ҷониби соҳибкори ватанӣ Шуҳрат Нурматов ба хотири истиқболи сазовор аз ҷашни муқаддаси миллӣ – 35-солагии Истиқлоли давлатии Ҷумҳурии Тоҷикистон дар масоҳати зиёда аз 3 ҳазор метри мураббаъ бунёд карда шудааст.  Дар бунёди корхона конструксияи металии ширкати ватании “Фаровон” истифода гардида, онро ба таври замонавӣ мутахассисони маҳаллӣ сохтаанд.

Самти фаъолияти корхона ба коркарди шиша, яъне буридан, обу тобдиҳӣ, суфтакунӣ, мустаҳкамкунӣ, сурохкунӣ ва истеҳсоли оина равона шудааст.

Иқтидори истеҳсолӣ дар як сол коркарди 40 ҳазор метри мураббаъ шишаро ташкил медиҳад.

Дар корхона 9 дастгоҳи замонавӣ барои коркарди шиша васлу насб гардидааст. Маҳсулоти нимтаёр аз хориҷи кишвар ворид гардида, дар 6 марҳила коркард мешавад, ки барои шишабандии биноҳои баланошёнаи истиқоматӣ, иншооти маъмурӣ, дару тиреза ва ҳамом лозим меояд. Шишаи дар корхона коркардшуда ба гармию сардӣ ва зарба тобовар буда, бехатарии он ба инсон таъмин карда мешавад.

Оина бошад, бо андоза ва намудҳои гуногун дар хати алоҳида истеҳсол карда мешавад. Чунин таҷҳизоти замонавӣ ба ҷумҳурӣ бори нахуст ворид гардидааст.

Дар хати истеҳсолӣ шишаи суфтагардида ва обу тобёфта дар 7 марҳила коркард шуда, аз он бо усули ҷадид оина барои истифодаи рӯзгор истеҳсол карда мешавад. Мавриди зикр аст, ки қаблан ин намуди маҳсулоти зарурӣ дар мамлакат хеле кам истеҳсол мегардид ва асосан аз хориҷа ворид карда мешуд. Бо фаъол гардидани корхонаи коркарди шишаи Ҷамъияти дорои масъулияти маҳдуди “Шишасохтмон” талаботи аҳолӣ ба он то андозае аз ҳисоби истеҳсолоти ватанӣ таъмин карда мешавад. Маҳсулоти корхона ивазкунандаи воридот буда, дар бозори дохилӣ талабгори зиёд дорад.

Дар заминаи ба кор андохтани корхонаи мазкур зиёда аз 30 нафар сокини маҳаллӣ бо ҷои кори доимӣ ва маоши хуб таъмин шуданд.

Дар гушаи алоҳида номгуи гуногуни маҳсулоти тайёри корхонаи мазкур ба намоиш гузошта шуд, ки аз он Президенти мамлакат муҳтарам Эмомалӣ Раҳмон дидан намуданд.

Маҳсулоти шишагӣ ба стандарти байналмилалӣ ҷавобгу мебошад ва дар асоси фармоиши мизоҷон омода гардида, ҳамчунин бо ҳаҷм ва андозаи гуногун дар бозори дохилӣ ба фуруш гузошта мешавад.

Бунёди корхонаи мазкур дар мамлакат боис мегардад, ки ҳаҷми истеҳсолот зиёд шавад ва ин омил дар татбиқи ҳадафи чоруми стратегӣ-саноатикунонии босуръати кишвар замина мегузорад.  

Источник: president.tj