Дар ноҳияи Абдураҳмони Ҷомӣ коргоҳи дӯзандагӣ ва адрасбофии «Сомон» ифтитоҳ гардид

0
77

Дар ноҳияи Абдураҳмони Ҷомӣ коргоҳи дӯзандагӣ ва адрасбофии «Сомон» ифтитоҳ гардид

ДУШАНБЕ, 06.03.2020 /АМИТ «Ховар»/.  Дар арафаи Рӯзи Модар  дар ноҳияи Абдураҳмони Ҷомӣ бо иштироки раиси вилояти Хатлон Қурбон Ҳакимзода коргоҳи дӯзандагӣ ва адрасбофии «Сомон» мавриди баҳрабардорӣ қарор гирифт. Акнун чандин нафар занони хонашин бо ҷойи кор таъмин мегарданд, ки беҳтарин туҳфа барои онҳо дар ин ҷашн маҳсуб мешавад. Дар ин бора хабарнигори АМИТ «Ховар» бо истинод ба маркази матбуотии раиси вилояти Хатлон иттилоъ медиҳад.

Тавре  14 октябри соли 2019 Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон зимни мулоқот бо соҳибкорону саноатчиёни мамлакат иброз намуданд, «дар шароити имрӯзаи пешрафти иқтисодӣ соҳаи саноат яке аз соҳаҳои муҳими иқтисоди миллӣ маҳсуб ёфта, таъмин намудани рушди он яке аз вазифаҳои афзалиятнок ба шумор меравад».

Мавриди зикр аст, ки коргоҳи мазкур бо дастури бевоситаи Президенти мамлакат муҳтарам Эмомалӣ Раҳмон бунёд ва мавриди баҳрабардорӣ қарор дода шудааст.

Сохтмони коргоҳи дӯзандагӣ ва адрасбофии «Сомон» аз ҷониби  мақомоти иҷроияи ҳокимияти давлатии вилояти Хатлон бо маблағи зиёда аз 450 ҳазор сомонӣ шурӯъ гардида, дар фурсати кӯтоҳ бинои дуқабата бо масоҳати умумии 280 метри мураббаъ бунёд ёфт.
Иншоот бо усули меъмории замонавӣ, бо истифода аз унсурҳои миллӣ ва масолеҳи хушсифати ватанӣ бино гардидааст. Зимни корҳои сохтмонӣ 12 бинокори маҳаллӣ бо кор таъмин шуданд.
Бино ба зикри манбаъ,  айни замон дар коргоҳ 20 адад дастгоҳи дӯзандагӣ ва 10 адад дастгоҳи адрасбофӣ мавҷуд буда, беш аз 30 нафар бо ҷойи кор таъмин мебошанд. Дар коргоҳ ҳунарҳои қуроқдӯзӣ, чакандӯзӣ, гулбаст, попурӣ ба роҳ монда шудаанд.

Раиси вилоят роҳбарии коргоҳи мазкурро ба зимаи бонуи соҳибкор Муқаддас Султонова вогузор намуд.

Муқаддас Султонова, ки ба намояндагӣ аз ноҳияи Абдураҳмони Ҷомӣ 14 октябри соли гузашта дар мулоқоти Президенти Ҷумҳурии Тоҷикистон муҳтарам Эмомалӣ Раҳмон бо коргарони соҳаи саноати ҷумҳурӣ иштирок ва суханронӣ намуд, ба Пешвои миллат барои таъмини фазои созгори фаъолияти истеҳсолӣ, пешниҳоди имтиёзҳо, дастгирии соҳибкории хурду миёна ва дигар тадбирҳои созандаи роҳбарияти давлату Ҳукумати мамлакат изҳори сипос намуд.

Бино дорои шароити мусоид буда, дар он то 50 ҷойи кори доимӣ барои бонувони ҳунарманду дӯзанда ташкил карда мешавад.

Минбаъд дарсҳои амалии муассисаҳои таълимии маркази ноҳия аз фанни технология барои духтарон дар ин коргоҳ доир мешаванд, то ҷавондухтарон соҳиби касб гарданд.

Дар ноҳияи Абдураҳмони Ҷомӣ коргоҳи дӯзандагӣ ва адрасбофии «Сомон» ифтитоҳ гардид Дар ноҳияи Абдураҳмони Ҷомӣ коргоҳи дӯзандагӣ ва адрасбофии «Сомон» ифтитоҳ гардид

Источник: khovar.tj