Дар Москва Шӯрои умумироссиягии маҳфили «Ҷавонони дар хориҷи кишвар таҳсилдошта» доир мешавад

0
64

Дар Москва Шӯрои умумироссиягии маҳфили «Ҷавонони дар хориҷи кишвар таҳсилдошта» доир мешавад

 ДУШАНБЕ, 02.12.2019 /АМИТ «Ховар»/. Имрӯз дар шаҳри Москваи Федератсияи Россия Шӯрои умумироссиягии маҳфили «Ҷавонони дар хориҷи кишвар таҳсилдошта» баргузор мегардад. Ҷаласаи Шӯрои маҳфил бо дастгирии Сафорати Ҷумҳурии Тоҷикистон дар Федератсияи Россия роҳандозӣ шуда, он таҳти раёсати раиси Шӯрои намояндагии маҳфили «Ҷавонони дар хориҷи кишвар таҳсилдошта» дар Федератсияи Россия Имомуддин Сатторов гузаронида мешавад. Дар ин бора ба АМИТ «Ховар» роҳбари маҳфили «Ҷавонони дар хориҷи кишвар таҳсилдошта» Каримҷон Салимзода аз шаҳри Москваи Федератсияи Россия хабар дод.

Дар ҷаласаи Шӯро роҳбари маҳфили «Ҷавонони дар хориҷи кишвар таҳсилдошта», роҳбарони намояндагии маҳфил дар шаҳр, вилоятҳои Федератсияи Россия ва аъзои фаъоли маҳфил иштирок менамоянд.

Ҷаласаи Шӯрои умумироссиягии маҳфили «Ҷавонони дар хориҷи кишвар таҳсилдошта» дар як сол як маротиба доир шуда, дар он вобаста ба тақвияти кори маҳфил дар Федератсияи Россия, амалинамоии нақшаи кори маҳфил, ба роҳ мондани амалишавиии Нақшаи фаъолияти кори маҳфил барои солҳои 2019 -2020, баргузории барномаҳои гуногуни адабию маърифатӣ, оммавию варзишӣ ва ҳамзамон як зумра масъалаҳои ҷорӣ мавридӣ баррасӣ қарор дода мешаванд.

Дар Федератсияи Россия намояндагии маҳфил дар заминаи дастгириҳои Сафорати Ҷумҳурии Тоҷикистон дар Федератсияи Россия фаъолият намуда, то кунун дар беш аз 25 минтақаи Федератсияи Россия намояндагии маҳфил таъсис ёфтааст.

Ёдовар мешавем, ки Шӯрои умумироссиягии маҳфили «Ҷавонони дар хориҷи кишвар таҳсилдошта» соати 14:00 ба вақти Москва оғоз шуда, соати 19:00 ба анҷом мерасад.

Источник: khovar.tj